ANGOLO DELLA POESIA

01 Nov 2014 05:23

Pubblichiamo una delle più belle poesie di Edoardo De Filippo, grande uomo di teatro ,che ha lasciato e lascia in tutti noi un grande vuoto e grandi verità, alla ricerca della felicità cui aspira tutta la gente. a cura dell’Osservatorio Interpartitico Pari Opportunità

Io vulesse truvà pace

Io vulesse truvà pace;

ma na pace senza morte.

Una, mmieze’a tanta porte,

s’arapesse pè campà!

S’arapesse na matina,

na matin’ ‘e primavera,

e arrivasse fin’ ‘a sera

senza dì: “nzerràte llà!”

Senza sentere cchiù ‘a ggente

ca te dice:”io faccio…,io dico”,

senza sentere l’amico

ca te vene a cunziglià.

Senza senter’ ‘a famiglia

ca te dice: “Ma ch’ ‘e fatto?”

Senza scennere cchiù a patto

c’ ‘a cuscienza e ‘a dignità.

Senza leggere ‘o giurnale…

‘a nutizia impressionante,

ch’è nu guaio pè tutte quante

e nun tiene che ce fà.

Senza sentere ‘o duttore

ca te spiega a malatia…

‘a ricett’ in farmacia…

l’onorario ch’ ‘e ‘a pavà.

Senza sentere stu core

ca te parla ‘e Cuncettina,

Rita, Brigida, Nannina…

Chesta sì…Chell’ata no.

Pecchè, insomma, si vuò pace

e nun sentere cchiù niente,

‘e ‘a sperà ca sulamente

ven’ ‘a morte a te piglià?

Io vulesse truvà pace

ma na pace senza morte.

Una, mmiez’ ‘a tanta porte

s’arapesse pè campà!

S’arapesse na matina,

na matin’ ‘e primavera,

e arrivasse fin’ ‘a sera

senza dì: “nzerràte llà!”